Geçen hepdede Türkmenistanyň Döwlet haryt-çig mal biržasynda ýerli we daşary ýurt telekeçileri tarapyndan ýurdumyzyň dokma kärhanalarynyň önümleriniň uly toplumy satyn alyndy.

Daşary ýurt puluna Russiýanyň, Türkiýäniň, Owganystanyň, Azerbaýjanyň, Ermenistanyň, Ukrainanyň we Gyrgyzystanyň täjirleri aýna listlerini, pagta ýüplügini, žakkard we boýalan tüýjümek önümlerini satyn aldylar. Şeýle hem Gazagystanyň we BAE-niň iş toparlaryna 12 million 48 müň manada deň bolan pagta ýüplügi ýerlenildi.

Ýerli telekeçiler tarapyndan milli manat serişdelerine elde dokalan halylar we pagta süýümi satyn alyndy.

Şeýle-de TDHÇMB-de uçar kerosinini, aýna listlerini, pagta lintini, plastik gapaklary we beýleki harytlary satyn almak boýunça söwda geleşikleri hasaba alyndy.

Söwda geleşikleriniň umumy bahasy ABŞ-niň 62 million 433 müň dollaryna deň boldy.